Kachinreview

Ka ai: Lahpyaw Hawng Hkawng

Waimaw Chyum Jawng (Waimaw Theological Seminary) 10 ning hpring chyeju shakawn lamang hpe October (25), 2010 ya shani, Mukchyik lawk, Namwa Mare, Waimaw Ginwang e galaw lai wa sai. Chyeju shakawn Nawku Hpawng lamang hpe jahpawt daw 11:00 am kaw nna shana de daw hkying 1:00 pm du hkra rai nna, du sa ai shawa masha yawng 150 daram rai nga ai. KBC magam gun ni hte rau, Myitkyina, Htingnai, Sama Ginwang kaw nna kasa ni sa du shang lawm ma ai.

(10) ninghpring masat chyeju shakawn mungga hpe Rev. Dr. Hkalam Samson (KBC Amu Madu) kawn “Yesu gaw Hpung hpe Gaw da ai” (Ehpesu 5:22-33) ngu ai gabaw hte n’gun jaw lai wa sai . KBC Amu Madu a mungga hta, “Nawku Hpung gaw Sasana galaw na matu re. Tsa ban 21 aten e, Nawku Hpung gaw Hkam kaja ai Nawku hpung rai ra ai. Dai hta 1. Hpung masha ni shada da grau magyep kap ra ai. 2. Sape tai ai lam hta grau su hprang wa ra ai. 3. Nawku daw jau ai lam hta grau n’gun ja wa ra nga ai.  4. Sasana galaw ai lam hta grau myit hkrum wa ra nga ai. 5. Kabu gara shiga hpe grau dam lada ai ladat hte hkaw tsun sakse hkam ra nga ai.”
Chyeju shakawn hpawng hte seng nna Rev. Lagang Ze Hkawng (Jawng Up) gaw, “10 ning hpring chyeju shakawn lu ai majaw Karai Kasang ngai hpe naw jai lang nga ai ngu hkam sha ai. Labau ning gam langai mi hpe jawm sharawt da lu saga ai majaw mung grai myit hta kabu nga ai.”
Kahtap nna tsun ai hta, (10) hpring du hkra woi awn lu ai gaw, dangdi dangdep ai made ndai Chyum Jawng hta ap nawng na ngu ai myit masin hte woi awn wa sai. Ap nawng daw jau ai lam hpe madung tawn ai hku re. N’pawt kaw nna hpang wa ra ai re majaw, lam shagu hta ra ai hkrai hkrai re, nga ai.

Chyeju shakawn hpang hta lit la woi awn ai ni gaw, Tinggyang Up - Srn. Latung Bawm Lung, Hkalum ga - Rev. Sumlut Gun Gam (Trustee Ningbaw, Waimaw Chyum Jawng), Shachyen Shaga - Rev. Lagang Ze Hkawng (Waimaw Chyum Jawng Up), Chyum Jawng Labau hti - Rev. Sumlut Brang Awng, Akyu Hpyi - Rev. Bahkyam Tu Ja (Waimaw Ginwang Amu Madu), hte Shama ga - Rev. Dr. Nalaw Dai Hkawng (KTC, Jawng Up) ni rai ma ai.
Dai ning na jawng lung ladaw hpe “Shakawn Let Law Htam Wa Mu” Kolose 2:7 ngu ai ga baw hte, May 31, 2010 ya shani kawn sharin hpaw hpang wa sai. Ap nawng nga ai sharin sara/num aten hpring marai 13, aten chyen 2 hte kaga mu gun ni marai 6, yawng marai 21 rai ma ai. Jawng ma n’gun yawng marai 70 tup rai nga ai. Ndai Jawngma ni gaw Waimaw, Sama, Htingnai, Myitkyina, Uru Seng Maw, Manmaw, Chihpwi, Hkahku  Ginwang ni hte Sin Praw Hkran Sasana ginra (Chinese Borderline) na ni rai nga ai. Dai hta C.Th (Certificate of Theology) Jawng ma ni yawng 50 rai nna, L.Th Jawng ma ni yawng gaw 20 rai ma ai.
“Makau grup yin bying nga masa hta hkan nna Karai Mungga hpe chye na lu na Chyum hpaji masa hpe madung dat ai hku re. Asak hkrung ai Mungga hpe sharing ya ai Chyum jawng re majaw, prat masa, mungkan masa hta hkan nna Chyum hpaji masing masa lamang ni mung jawt wa ra nga ai. Dai majaw, ya C.Th, L.Th lamang ni rai tim, du na ra ai 2014-2015 hkan kaw nna gaw, B.Th lamang ni hpe mung hpang wa lu na matu myit shingran mu da ai hku re” nga nna Sr. Htawshe Dau Hkawng (Jawng Hpaji Up) gaw Jawng a shawng lam ningmu hpe tsun dan ai.
10 hpring chyeju shakawn lu ai gaw, kalang bai n’gun jat ya ai re ngu hkam sha lu ai. Hpa majaw nga yang 10 ning ting lai di wa ai mahkrum madup ni kaw nna sharing la nna shawng de grau hkrak hkra lahkam saw a lu na matu rai nga ai, nga tsun ai.

C.Th 2nd year hta lung nga ai Jawng ma Shd. Zung Sau gaw, Hpaji tsang kaji tim, Karai Kasang a Mungga hpe sharing la lu ai majaw, Karai Kasang hpe chyeju shakawn ai zawn, Waimaw Chyum Jawng hpe mung grai chyeju dum nga ai. Dai sha n’ga, Chyum Jawng asak 10 ning hpring ai Chyeju Shakawn ai aten ladaw hta jawng sa laung ang ai hte shang lawm lu ai majaw grai n’gun lu nga ai re, nga nna shi ningmu hpe tsun wa ai.
Waimaw Chyum Jawng gaw, lai wa sai 2000 ning kawn aten kadun Chyum Jawng hku nna Waimaw Ginwang rung hta hpaw hpang wa sai.  2006 ning kawn Waimaw mare hte mile 7 daram tsan ai Mukchyik lawk, Namwa Mare de htawt sit let Chyum Jawng langai hku nna Waimaw Ginwang madi shadaw ai hte gaw sharawt wa sai.
2006 ning kawn hpaw hpang ai KBC Chyum Jawng zinlum Dap kata e nga ai Chyum Jawng ni gaw, KTC Nawng Nang, Kuthkai Chyum Jawng hte Waimaw Chyum Jawng ni rai ma ai.