Luka 2: 10,11
“Dai majaw lamu kasa gaw, hkum hkrit myit; yu mu, masha nlang a matu nachying kabu gara mai ai shi ga, ngai nanhte kaw gun sa ring ngai; dai ni na nhtoi hta Hkye Hkrang la ai wa Hkristu ngu ai Madu gaw, Dawi a mare e nanhte a matu shangai wa sai:”
Marku 6:21-27
“Ya, Herod a shangai ai nhtoi du nna, shi gaw shi a hkringmang ni, hpyen du ni hte Galile mung na agyi ni hpe shana shat galaw daw nga yang: mai ang ai nhtoi du ai majaw, Herodia a shayi sha shang nhtawm ka nga ai: dai lam hpe, Herod hte shi hte rau dung ai ni gaw ra mu ai. Dai rai nna, dai hkawhkam gaw, Nang tsaw matsaw ngai kaw hpyi rit ngai jaw na de ai, ngu nna dai mahkawn hpe tsun wu ai. Dai hta n-ga, Nang ngai hpe hpyi mahpyi, nye a mungdan kaang hkup du hkra, ngai nang hpe jaw na de ai, ngu nna shi hpe dagam wu ai. Shaloi shi pru wa nna shi a kanu hpe, Ngai hpa hpyi na ma? Ngu nna san yu yang, shi gaw, Baptisma jaw ai Yawhan a baw hpe hpyi u, ngu wu ai. Shaloi jang dai hkawhkam hpang de shi tin tin shang nna, Baptisma sara Yawhan a baw hpe, ban hta e nang ngai hpe ya jang jaw na, ngai ra nga nngai, ngu nna hpyi wu ai. Dai hkawhkam chyawm gaw ja ja myit yawn nga ti mung, dai dagam kau ai ga hte, rau dung rau hpawng nga ai ni a majaw, shi hpe ndang kau mayu ai n rai. Shaloi jang, hkawhkam gaw, mang galang langai mi hpe shangun dat nna, Yawhan a baw hpe sa la na, hkang dat wu ai.”
Tsawra ai hpu nau ni, nau n na ai aten hta, Madu Yesu shangai wa ai Hkristmas ten mung du wa ra ai. Mungkan ting gaw Hkristmas ten a matu kabu pyaw nga na sai ngu mung kam nngai. Hkristmas ten hta Hkristan n re ai ni pyi Hkristmas mawn sumli (Christmas Decoration) ai ladat amyu myu a lapran chye pyaw nga ma ai. Dai ni na ten hta Mungkan shinggyim masha law malawng gaw Hkristmas ten hpe kabu pyaw hpa nhtoi langai mi hku nna hkap la shajang ma ai.
Raitim, kabu gara ai (Merry) ngu ai hpe, pyaw daw kadaw ai lam hte kalang lang anhte ni kayau kau chye nga ga ai.
Ndai lahta na chyum daw lahkawng hpe shingdaw yu dat ai shaloi, shangai nhtoi lahkawng a lam hpe mu lu nga ai. (1) Langai mi gaw asak Jaw ya ai lam shangai nhtoi, (2) Bai nna, langai mi gaw pyaw daw kadaw na matu manang wa a asak hpe lahpawt lama n di ai sha dawm la kau ai shangai nhtoi a lam hpe mu lu nga ai.
Dai ni na ten hta, anhte ni yawng mung shangai nhtoi (Birthday) chye galaw ga ai. Shangai nhtoi hkrak n lu matsing kau ai ni mung mung chying masat lakmat (ID Card) ni galaw ai shaloi nhtoi langai ngai hpe masat nna bang la chye ga ai. Shaloi gaw, anhte ni birthday ngu ai hpe tara shang galaw masat la lu sai, nga yang, yawng gaw tinang a shangai nhtoi hpe pyaw hpa lam langai hku galaw chye ga ai. Ndai shara kaw, anhte ni myit yu lu na matu, ndai Mungga hpe htawn tsun mayu nngai re.
“A lu ai shangai nhtoi” ngu ai gaw, kaja nan pyaw htum ai nhtoi rai nga ai. Dai kaw yawn hkyen hpa n lawm ai, kaya hpa n lawm ai, dangrang hkat na ten n nga ai, shatan nhkan na shara n pru sai, yawng gaw ngwi pyaw simsa lam hte kabu hpa ni pru wa chye nga ai.
(1) Asak jaw ya ai shangai nhtoi
Madu Yesu shangai ai shaloi, lamu kasa ni tsun ai gaw, “nachying kabu gara mai ai shi ga” nga tsun ai. Madu Yesu a shangai ai lam gaw, kaja nan, shinggyim masha yawng a matu Kabu hpa tai na matu yaw shada ai raitim, n lu kabu ai ni mung nga taw ai hpe mu lu nga ai. Ndai lamu kasa ni tsun ai kabu gara mai ai lam gaw, kaja nan, shi hpe ra sharawng ai ni, Madu Yesu hpe ala dingda nga ai ni, Madu Yesu a tengman ai mungga hpe sharawng ai ni a matu sha kabu hpa rai nga ai. Madu Yesu shangai ai shaloi n lu kabu ai ni mung nga taw ai hpe mu lu ai. Dai ni gaw, Herod Hkawhkam zawn re ai ni, Mung shawa a ntsa, n tara ai hku dip sha, shagyeng sha, ntsa de na Kehta Hkawhkam zawn re ai ni hpe sha hkrit nna, shi npu na Mung shawa hpe gaw hkrup mara rai adip arip nna up sha nga ai ni re majaw, dai zawn tengman lam hpe hpaw tsun na wa, n tara ai ladat hpe galai shai kau na wa, du sa na, nga ai shaloi gaw, gara hku mung n lu kabu nga ai. Madu Yesu gaw, shi shangai ai aten kaw nna, dai zawn, shi hpe n hkap la ai ni, shi hpe ninghkap nna sat gyam na ni hpe mung tau hkrau chye da nga ai. Raitim, Shi hpe sharawng nga ai ni a matu laksan asak hpe ap nawng nna, shinggyim hkumhkrang hpe hkam la nga sai. Dai majaw, shi shangai wa ai lam gaw shi asak hpe ap ya ai nhtoi rai nga ai. Dai majaw, Hkristmas ngu ai gaw, kabu hpa tai wa sai. Tengman ai lam hpe sharawng ai ni a matu, Tsawra myit chye madun ai ni a matu kaja nan kabu hpa ten rai nga ai. Raitim, Hkristmas ten hta n lu kabu yang gaw, lama mi ra taw sai hpe anhte dum ra na ga ai. Nang kadai hpe mara n lu dat ya ai kun? Nang na kraw lawang hta e nhpru n mai lam gawmai gawsha hpa ni wa gindun nga ndai kun?
(2) Pyaw daw kadaw ai shangai nhtoi
Herod hkawhkam mung shangai nhtoi galaw ai hpe Marku laika hta mu lu nga ai. Raitim, shi a shangai nhtoi gaw pyaw daw kadaw ai lam rai nga ai. Herod gaw Hkalup sara Yawhan hpe, shi kanau a madu jan Herodia hpe la yang n htuk ai lam shadum ai a ninghkan e, shi hpe htang hta sharen da nna shi shangai nhtoi hpe galaw nga ai rai nga ai. Shi kraw kata hta, tengman ai lam hpe sharawng ai lam gaw mu lu nga ai. Dai majaw mung shi Hkalup sara Yawhan hpe n sat gwi ai. Raitim, shi shangai nhtoi shaloi, Herodia a shayi sha hpe pyaw daw kadaw ai poi hta, majoi mi ga sadi shajan ni jaw kau ai majaw, Hkalup sara Yawhan a asak hpe lahpawt lama n nawn ai sha, majoi mi daw jaw kau ai kaw du mat ai rai nga ai. Raitim, shi n pyaw ai, shi “ja ja myit yawn nga ti mung,(Mk. 6:26)” nga nna chyum laika hta tsun da nga ai. Shi shangai nhtoi hta shi nan n pyaw ai lam hpe mu lu nga ai. Hkrak nga yang, Hkalup sara Yawhan gaw shi hpe tengman ai lam hta tsap na matu shadum ai she rai nga ai, raitim, shi n hkap la ai sha n ga, hpang jahtum asak du hkra dawm kau ya ai. Masha ni a matu n re ai sha, shi a sari shadang a matu, masha asak hpe majoi mi jai lang kau ai lam hpe mu lu nga ai.
Tsawra ai hpu nau ni, ndai Hkristmas ten sha n rai, anhte ni yawng a shangai nhtoi shagu hta mung yawng a matu ap nawng chye ai sakhkrung lam hpe Jaw ya ai shangai nhtoi shagu gaw kabu hpa tai na re. Shangai nhtoi ngu ai gaw Mungkan ga de asak hkrung hpang ai nhtoi rai nga ai. Nang gaw kaning re ai shangai nhtoi hpe mahtang ra sharawng ndai kun? Pyaw daw kadaw ai shangai nhtoi mahtang kun? Madu Yesu zawn ap nawng ai shangai nhtoi hpe mahtang nang sharawng ndai kun? Anhte lata la na aten gaw ya, Hkristmas ten hta rai nga sai. Yawng hpe Karai Kasang shaman ya ai “A lu ai shangai nhtoi” lu la shajang mu ga. Amen.
