July 18, 2011Ka Ai: Tsa Ji
Sanggang mare kaw byin hpang wa ai majan gaw, KIO/KIA hte Myen hpyen dap a yaw shada lam shai nga ai.
KIO hte KIA a mjan gaw Tahkaw hka wan jak hpe sha madung dat nna gasat ai nre.
June 9, 2011 ya shani Sanggang mare hta KIO/KIA hte Myen hpyendap gawTahkaw hka wan jak nga ai shara kaw majan byin hpang wa ai re. Raitim KIO gaw Tahkaw hka wan jak a majaw sha gasat ai gaw nrai nga ai. KDNG uhpung sawk sagawn ai. Jinghpaw mungdaw kata hta hydropower masing hte seng nna, Myen Asuya hte Miwa ni hkyen lajang galaw nga ai gaw, 2003 ning kaw nna 2011 ning du hkra, shaning law law wa rai nga sai. KIO/KIA gaw dai laman hta majan kasat na lam ntsun ga ai.
Shaning law law wa tinang mungdaw hte amyu sha ni lu ging ai ahkaw ahkang ni hkrat sum nga sai. KIO/KIA hte Myen hpyendap gap hkat jahkring nga ai (17) ning laman, Myen hpyen dap kaw nna, KIO/KIA hpe lang hte lang jahte tam, mara tam ai, ladu shalai shinggyim ahkaw ahkang tawt lai ai lam galaw ai. Ya hpang jahtum Sanggang mare na KIA mu gun A gyi Chang Ying hpe Myenhpyen dap kaw na lu rim nna, tara nlang ai hku jingri sat kau ai lam hpe bai hkrum nga ai. Dai majaw KIO/ KIA uhpung gaw, Myen mungdan a dinghku majan rai sai ngu ndau nna, majan kasat hpang wa ai rai nga ai. Dai majaw KIO/ KIA gaw lu la ging ai ahkaw ahkang lu wa na matu majan kasat ai re. Myen mung dan a mung masa galai shai lu na matu ninggam langai mung rai nga ai. Dai majaw mung masa majan she re.
Tsawp galai Myenhpyen asuya gaw Htingbu Miwa mungdan a sut masa rai nga ai Hydropower wan jak shim lam a matu gasat hpang ai re.
Myen hpyendap hte Ting Sein Asuya a matu chyawm gaw, Ta Hkaw hka wan jak a majaw majan kasat hpang wa ai hpe asan sha mu ai. Myenmung Dan hta Miwa mungdan gaw USD 20,000 Billions (wan mun lahkawng) arang bang nga sai re. Jinghpaw mungdaw kata kaw hydropower wan jak masing hta USD 3.6 Billions hte nhprang rai htu shaw ai kaw arang law law bang da let galaw nga ai re. Dai hpe shim lam lit la ai gaw Myen hpyen dap rai nga ai. Hydropower Hka wan jak masing a majaw, tinang mundan kata hta shingra tara hten za ai, mung masha ni arum ara rai du taw sai hkaw mat na, shinggyim ahkaw ahkang laja lana tawt lai ai ni hpe, ahkyak ntawn ai, Htingbu Miwa mungdan a sut hpaga masing hpe madung tawn let makawp maga nga ai gaw Mye hpyen dap hte Ting Sein Asuya re hpe mu mada ai. Dai majaw Myen hpyen dap gaw Hydropower wan jak hpe madung tawn let gasat ai lam rai nga ai.
Mung masa hte Mang hkang hparan lu ai lam ningpawt
Matut nna tsawp kalai Myen hpyendap asuya ni sha mungdan uphkang nga yang gaw, jet ai, hkrung gin ai bawngring masing (sustainable Development) hpe gaw lu la na nre. “Sharaw hpe shan hkum rim sha” ngu ai hte she bung nga ai. Sharaw gaw kan hkru ai shaloi yup taw nga ai raitim, kaw si yang nam shan hpe bai rim sha na sha rai nga ai. Loi loi hte sha hpyen gumshem ladat hte jahkrit sha ai namchyim hpe tawn da na nrai nga ai. Matut nna, shanhte a lahkum ngang na matu masu hkalem na sha rai nga ai.
Dai majaw Myen mung dan a structural Change ngu ai, gaw gap da ai tara hkrang nnan hpe galai shai kau ra ai, Myen hpyendap up ai ladat hpe dawm kau rai ai. Myen amyu sha ni a mungdaw langai hpe masat kau ra ai. Federal democracy asuya rai ra ai. Shaloi she jet ai, hkrung gyin ai bawngring lam hpe gaw gap la lu na re. Ngwi pyaw simsa lam lu la na re.
Ndai lam ni byin lu na matu gaw,
(1) Myen mung dan kata na Amyu bawsang ni yawng shanglawm mai ai, (2) Mung masa hpung ni shang lawm ai, (3)Tsawp kalai hpyendap asuya ni shang lawm ai, masum brum hkrum zup bawngban hpawng galaw na gaw ahkyak rai nga ai.
Dai majaw KIO a lit sha nrai, Myen mung dan hta shanu nga ai amyu bawsang ni yawng hte mungchying sha ni yawng shakut shaja shanglawm na gaw ahkyak rai nga sai. Shaloi she myit mada ai ban dung de du lu na re.
(Tsa Ji gaw Jinghpawn Wunpawng Bawngring Mahkri Shawn HPung(KDNG) a ning gawn amu madu rai n'na, laiwa sai shaning hta "Valley of Darkness" ngu ai Hugawng pa hta byin nga ai makau grupyin htenza lam report hpe sawk sagawn dip shabra lai wa sai, Myitsu salang langai mung rai nga ai)
