Kachinreview

 

June 28, 2011
Ka Ai: Slg Naw Hkam

June shata 25 ya shani nhtoi hte Kachinnews website kaw mara da ai shiga hta Myen Hpyendap gaw Mahtu Naw woi awn ai Kachin Democratic Army (KDA) hpung ni hpe KIO/KIA hpe kasat ai hta jailang na nga tsun nga ai. Mungshawa ni hku nna KDA hpung hpe htet shana dat mayu ai gaw KIA hpe kasat shamyit na hta n shanglawm na matu laja lana htet dat mayu ai.

Sumla: Myit hkrum ai gaw n'gun

N-ta-U-la lahkawng hpe di-hkama chya nna htawnghkat shagun ai lam ni n dai rawt malan ginra hta law law byin pru lai wa sai. Myen a sumprat a majaw laisai ten 1995 ning hta Manepalaw KNU hpyedap Duju ayai mat sai, Christian KNU hte Buddha KNU ngu lahkawng brang byin hkra myendap ni galaw kau dat ma ai, dai hpang Buddha KNU ni gaw Democratic Buddha Army (DKBA) ngu mying shamying la kau nna KNU hpe agying agang htim kasat mat wa sai, DKBA a shingdu kaw myendap gwi la ni galoi mung control galaw nga ai. Kahpu kanau majing rai nga ai KNU hte DKBA gaw shada kasat hkat ai hta hpa akyu n pru ai, tinang mungshawa machyi ai hte ti-nang hpyenla ni si htum wa ai sha byin pru ai. Dai hpe mu nga ai myendap ni gaw kabu kabung dum nga ma ai. DKBA hpe shawng ningnan KNU kawn garan pru hkra galaw dat ai shaloi myen ni tsun ai gaw nanthe a Kawtule Mungdan (Kayin Mungdaw) hpe nanhte DKBA ni uphkang lu na re ngu gasadi jaw ma ai. Raitim latatut hta kaga ga rai mat sai.

1978 ning hta KaLaLaTa or Karenni National People’s Liberation Front  (KNPLF) gaw Karenni National Progressive Party (KNPP) kawn hka garan mat ai hpang, n dai kahpu kanau yan gaw galoi mung gaphkat mat wa sai. 1994 ning hta Tun Kyaw woi awn ai KaLaLaTa hpung gaw 1994 ning hta Myendap hte simsa lam la kau nna hpaga galaw sha mat wa sai, raitim myen hpyendap e shangun jang rau amyu langai sha rai nga ai Karenni hpung KNPP  hpe sa kasat ya ra nga ai. KaLaLaTa a matu mung KNPP a matu mung hpa a kyu n pru, akyu pru amyat lu ai gaw myen dap ni sha rai. Kahpu kanau lahkawng nhtuk taw nga jang shi gaw apyaw sha dip up sha pyaw nga nu ai.

KDA gaw KIO/KIA kawn masa lam amyu a majaw hka garan mat ai re hpe mungshawa ni hku nna kaga mi n htai lai sai, lahkawng maga na woiawn nga ai ningbaw ni myit masa bran wa ai shani, bai mai shazup na re hpe kam ga ai, ya ten hta KDA hte KIA gaw hpa manghkang n nga shi ai re majaw, ya ten kawn lahkawng maga, manghkang n byin hkat hkra koi yen hkat nga ai gaw kaja dik rai nga ai, hpa majaw nga yang KDA mi nga nga KIA mi nga nga w.p kanu kawa ni kawn shangai shaprat da ai kashu kasha ni sha rai nga ma ai.

Dai hte maren, Du kaba Lasang Awng woi awn ai hpung ni, NDA-K-border guard force hpung ni, Sara Doi La hpung ni, KIOKIA kawn hka wa ra ai lam gaw, lama ma a majaw re, dai hpe mung mungshawa ni n htai lai sai. Anhte mung shawa ni htet dat mayu ai gaw hpunau shada htim kasat hkat shangun ai hta koi yen hkat ga. Hpang jahtum myendap ni nau shadut wa jang, myendap hpe mahtang n htang kasat mat ga, hpyen gaw myendap she re anhte shada n re, anhte shada ra rawng ai hpe gau ngwi ngwi sharai la mat ga. Shada gaphkat nna KDA, NDA, Lasawng Awng Wa hpung ni hpyenla si sai da, KIA hpyenla si sai da, mungshawa ni n gwi na ga ai, tinang mayu sha ni lang da ai sinat machyu pala gaw, myen hpyen ni hpe gap ai machyu she shatai ga. Ti-nang maga hpyen hpung lahkawng kasat hkat nna si jang, jinghpaw gumgai ni she hkrap na re, myen gumgai ni n hkrap na ma ai.

Dai majaw myen dap ni atik anang shawnglam de sa na matu shagyeng wa tim, masu nna alau wa tim, KIA hpe kasat na hta n shanglawm ga, du kaba ni a lapran tinang shada n gaphkat ga ngu gasadi tawn da ai hte maren dai gasadi hpe rem kyem ga.