Amyu langai rawt jan galu kaba bawngring wa na matu gaw Dinghku shagu a nga mu nga mai lam gaw mdung rai nga ai. Dai zawn nga mu nga mai ai madang de du na matu mung Kawa La ni a woi awn ai jasat jasa hta grai madung ai rai nga ai. Dai hku tsun nna, Num ni woi awn ai gaw tang n du ai, ngu nna tsun mayu ai lam n re. Ya ten gaw grau nna, anhte shingwang hta Num ni sha she woi awn nna, dinghku hpe bau maka nga ai hpe mu lu nga ai.
Anhte amyu ni hta ra rawng ai lam langai gaw, dinghku hpe atsawm woi awn lu ai kawa la ni grai n law wa sai hpe mu lu nga ai. Grau nna gaw, anhte amyu sha ni kaw na Kam ram ai shadang La ni law law wa shaning law law Rawt malan magam hta shang lawm ra mat ai zawn, nkau ni gaw nanghpam lusha hta machyu let, asak sum mat ai ni law wa ai. Nkau langai lahkawng sha nga taw ai ni mung hpaji machye machyang hta ningra nna, hpa n chye galaw mat ai. Moi de lung seng bungli kaja ai ten hta La ni ja gumhpraw tam ai lam hta grai kam mai ai raitim, ya ten hta dai zawn bai n rai mat wa sai. Hkam ja lam hta mung gawng kya ai majaw, law malawng gaw asak kadun ai hkrai law nga ai. Dai majaw, anhte Buga kata kaw yu dat ai shaloi Gaida grai law wa ai hpe mu lu nga ai.
Malihkrang Uma hku nna mu mada lawm ai hta, ya ten Rawt Malan magam bungli galaw nga ai Kawa La ni, Shadang la ni hte seng nna myit yu ra na daw hpe tang madun mayu nngai.
Rawt malan magam hta shang tsap nga ai Shadang La ni gaw ya ten hta anhte uhpung uhpawng hta law dik madang rai nga ai. Hkum ram ai hte n-gun wa ngan lapin rawng ai ni hkrai rai nga ai. Raitim, ya hte KIA mu gun (Du Jum) manang wa hte shaga yu ai shaloi grai myit htum na zawn nga nna shi tsun wa ai. Shi num la (dinghku shang) ai nau n na shi ai. Madu jan hte atsawm n lu nga ai. Ya hte sha kasha langai shangai ai shaloi jahkring mi Madu jan hte kasha hpe yu nna nga lu tim, jahkring mai rai yang Hpyen Dap (Shawng lam) de bai sa ra mat sana re lam chye lu ai. Grau nna gaw, shi dinghku hpe lit la ra ai dinghku kawa langai mi, tinang sha na lusha pyi atsawm n lu ai. Hpyen dap kata kaw shata shagu na ration hte budget pyi atsawm n lu ai sha nga ra ai ten hta Dinghku hpe gaw dai hku kabai da ra ai rai nga ai. Madu jan mung mahkrum madup hpa n nga ai majaw, hpa n chye galaw sha ai. Dai majaw, shi tsun ai gaw “dinghta ngarai” hkrat taw nngai law... nga ai.
Shi hte shaga ngut ai hpang, ngai hkrai bai matut myit yu ai gaw... dai zawn, kawa langai mi shakram da hkrum ai dinghku ni anhte Buga hta kade she law nga ai kun???? Ngu ai lam re. Ma ni a shawng lam, hpaji lam, makam masham lam, galaw lu galaw sha lam, nga mu nga mai lam (Livelihood), shim lam, hkam ja lam, yawng yawng hpe gara hku nna kanu shingtai lit la lu na.... dai zawn re ai Ma ni hkrai hkrai she law wa yang gaw anhte amyu ni a shawng lam gaw ngang grin lu na i... ngu ai lam ni re.
Shi tsun ai hta, KIA hpyen dap kata, Budget garan lang ai lam (contribution) hta n rapra ai lam ni law law nga ai lam mung tsun wa ai. Nkau ni gaw Lauban zawn she nga mat nna, nkau ni gaw shat pyi hkru hkru n lu sha ai madang kaw rai taw nga ai. Anhte gasat nga ai gaw Gumsheng Magam Asuya (Regime Government) hpe re nga tim, anhte kata kaw nan mung Gumsheng lailen lang let, lawu tsang kaw nga ai ni gaw dai hku kyet nna nga taw ra ai lam rai nga ai. Dai hte seng nna, kaga mi dinglun mung n mai ai zawn, ntsa kaw na amind hpe sha madat ra ai gaw tsang hpa rai nga ai.
Rawt Malan hkrun lam ngu ai gaw dip sha ai wa sha nga dingsa gaw rawt malan nga ra na re, nga nna Sara kaba Rev. N-ngai Gam tsun ai hte maren, aten kadun hte sha ngut ai baw mung n re majaw, jahkring mi sha gaw mai byin ai hku nga taw mu, ngu ai hku n re ai sha, aten galu masing ni jahkrat ra na ga ai. Dai ni anhte ni amyu sha lawt lu lam hte seng nna rawt malan wa ai shaloi, tara rapra ai lailen hte, mung shawa, dap shawa yawng a nga mu nga mai lam hpe mung n myit n mai rai nga ai. Maga mi laknak hpe hpai da ai zawn, maga mi, amyu sha rawt jat galu kaba wa na matu, Buga nga shawa yawng a galaw lu galaw sha masing ni, Hpyen Dap kata, hpyen Du, Hpyen ma ni yawng a shawng lam gam maka hpe mung myit shalawm nhtawm, dinghku hpe pawn ba lu na matu Hpung Shawa Polisi (Public policy) ni hpe jahkrat nna sa ra na re. Moi de Yu Li Hku shaloi, Bum ga masha ni malawng maga hten mat ai gaw, Rawt malan hkrunlam hta Public Policy hpe tau hkrau n jahkrat lu ai majaw mung rai nga ai. Mung Shawa ni hta hku hku wa na lam ni hpe tau hkrau n myit da ai, dai hpe myit na masha/komiti laksan n tawn ai, dai majaw anhte amyu sha ni matsan mayan si jawng mat ra ai rai nga ai. Ya raitim, mung shawa a nga mu nga mai lam hpe gara hku galaw ya na, ngu ai hpe aten galu a matu myit da ra na re. Dai n rai yang gaw, anhte amyu ni hpe kaga ni roi nna gaw n re ai sha, anhte na anhte yawng jahtum la kau ai hku tai wa chye nga ai.
Rawt malan hkrun lam hta grau nna gaw yawng shang lawm ai masing tai na matu, mung shawa, dap shawa a nsen manawng hpe madat let, ntsa kaw na woi awn ai ni tinang ngu ai hku hkrai n hkawm ai sha, yawng hpe jahkrum shara, hpaji hpyi, galaw lu na ahkaw ahkang garan ya (power sharing) re ai hku nna sa wa yang she kaja nan rawt malan hkrun lam hta awng dang wa na re. N rai yang gaw anhte kata kaw na gumsheng magam hpe shawng shamyit ra na masa hku she bai tai wa chye ai.
Rawt malan hkrun lam a majaw amyu sha yawng a gam maka hte dinghku hpe dingbai dingna jaw ai n tai na matu grai ahkyak ai. Dinghku shagu a nga mu nga mai lam hpe mung makawp maga lu na matu ahkyak nga ai. Ya ten galaw ra ai bungli hta Nanghpam Lusha sha n rai, lamu ga zing ai Sut Du ni hpe gawt ang yang gawt ra ai, Sadi jaw ging yang jaw ra ai, ninghkap ang yang ninghkap ra ai. Dai majaw, kaga amyu ni hta tara n rapra ai lam yawng hpe madi madun lu na matu mung anhte nan nan tara rapra ai lailen hpe lang ra na re ngu nna mu mada nngai. Dai hta n-ga, amyu sha yawng a galaw lu galaw sha lam ni hpe dingbai dingna jaw ai baw hpe mung koi gam ra na re, ngu nna tang madun dat nngai law.
