Ndai laman Yahoo hte Google websites ni hta pru ai shiga ni hta Myen Asuya gaw Shanglawt Rawt Malan hpung hpe shawng gap hpang ai nga mara shangun da lam, ka da nga ai. Ndai gaw mungkan shi-seng media hpe gumshem Myen atsuya gara hku nna, gade daram lu lang ai hpe madun nga ai. Ndai hta WP rawt malan hpung hpe rebel – tara shang ai atsuya hpe ninghkat rawt malan ai ni- ngu nna shamying tawn nga ai. KIA hpe rebel ngu nna dingyang shamying tawn ai gaw mungkan a myiman hpe gumshem atsuya mu shangun mayu ai hku yu mat wa na matu lajang la ai lam re. Kaga shara hkan KIA hpe insurgent, mungdan uphkang masa hpe rawt malan ai ni; armed militia – laknak lang ai kahtawng/mare masha, mung ngu nga ai.
Gumshem hpyen atsuya gaw tara shang ai mungdan atsuya re, tim KIA hpe gaw rebel, insurgent she re, ngu nna mungkan shawa hpe chye na hkap la shangun ai ladat re; ndai gaw news media a manu mana kaba la ai n-gun re. Shawa a myit hpe gang gayin la nna shagyip kau ya ai masa rai nga ai. Dai ni na globalized world – mungkan ting gumdin gumhkaw langai sha rai mat wa ai mabyin manghkang hta, lu lang yang n-gun kaba rai, n lu lang yang hkam mana na rai, rai nga ai.
Anhte maga hpe gara hku mu mat wa sai kun? KIO/KIA gaw mungmasa lam ai majaw, jet ai federal democracy sharawt mayu ai majaw, Munghpawm hpe gawgap shalat ai ni aru apawt shadaw dawhpum hku nna masat bang tawn ai tinang amyu mungdaw hta tinang uphkang lu ai ahkaw ahkang lu na, nga ai majaw rawt malan ai lam, Panglong Agreement hpe matut manat tawn nna sa wa ai uhpung, - ndai lachyum ni hpe shinggan nna n mu lu mat sai, n na lu sai, dai majaw kadai n chye mat sai. Anhte gaw, gumshem atsuya ya a matu rebel, insurgent ni sha re, ngu ai daram sha chye na mat sai.
KIO hpe “Aung San Lu “ ngu shamying ya ai ni pyi nga sai. Aung San Kaw hpe “aprat lai mat, nau gumgai mat nna n mai lang sai” nga ai shiga news media report galaw ai ni nkau mi gaw, KIO hpe “Aung San Lu” ngu mayu nna tinang nan bai mani gahe, re ai langai lahkawng hte hkrum yu sai, tengsha byin sai. Daup dat gaw n mai, hkam gaw n kam hkam rai yak kau sai.
Du Kaba G. Gam Shawng hte S. Gun Maw hte hkrum yu ai ni chyawm gaw “Ndai yan gaw KIO zawn n re” bai nga ma ai.
Shinggan de na news media report galaw ai ni a matu KIO hpe gaw n kam hkungga mat timung, KIA hpe gaw malai shatai na lam bai n mu mada, re ai manghkang byin nga malu ai. Tengsha re.
WP ni a yi-ngam Anhte hta gumshem atsuya zawn, daram, media laknak ginsup na atsam n nga ai. Shanhte chyam hkra galaw lu ai daram anhte n chye galaw ai, n-gun n nga ai.
Tim, gumshem atsuya a shiga masa gaw shamawng ai masa re; hti nna shanhte hpe kam ai gade daram nga ai kun? Gumshem atsuya hpe “kam ging ai ni, sadi dung ai ni” ngu masat la tawn ai mungkan mungdan hpa-awn ni gade nga nga ai kun? Tengsha n kam timung, Miwa Mungdan zawn, “kam masu ra ai” mungdan kade nga kun?
Anhte a lit – Anhte chye lu ai ndai daram re: Sinna democracy mungdan kaba ni hte gumshem atsuya hpe “n kam ai, kam yang shut ai” ngu chye na mat sai ni grai law nga ai. Ndai ni gaw, anhte maga de nna kasa ni du sa nna tsun ai hpe madat na jin jin rai taw nga masai. Anhte shanhte hpang de kyit-hkai kasa dat saga ni? Anhte sa tsun dan na anhte a agenda: “Anhte gaw insurgent n re, tengman jet ai federal democracy hpe sharawt na matu Panglong mahkyen hkan ai Munghpawm hpe makawp maga ai ni she re” ngu sa tsun dan na jin nga saga ni?
Ndai zawn re atsam shapraw nna kyit-hkai gintan la ai ningtau mungdan kaba ni garum la ai hte anhte a mahkyen awng dang lu na lam de matut sa wa ra saga ai law.
Comments