15 November 2011
Ka Ai; Kachin Review
Laiwa sai shata 27-28 October 2011 shani hta Mali Hka masing a majaw htawt sit mare n nan rai nga ai Aungmyinta Sanpya mare na Slg. Lahpai Tu, Slg. Lamung Aung, Slg. La Nu, Shd. Tu Lum, Slg. Uga La Hkun, Slg. Nbaban Gam Seng, Slg. Uga An Tu, Slg. Zau Seng,Slg. Lamai Aung hte lawuga na myen la lahkawng gaw Mali Hka madim kaba masing ginra e jahtu sha nga yang seng ang Myen asuya ni kawn rim mat wa ai lam Jinghpaw Wunpawng Bawng Ring Mahkri Shawng Hpung a n dau laika hte maren chye lu ai.
N dai makau mayan na buga masha ni gaw shaning na na wa ban hte ban yi sun hkau na hpe galaw sha wa ai ni rai nna gin htawng ten mali hka hkyet ai ten hka hkingau hkan sa nna ma ni jawng shabrai hte ding hku kata ra ai lam hpe madi shadaw lu na matu tinang dang lu ai ram hku nna ja htu sha ai rai nga ai.
Grau nna n dai rim hkrum ai Aungminta mare masha ni gaw Mali Hka ( Myitsone Dam) a majaw myen asuya kawn atik anang htawt shangun ai Tanghpre mare masha ni rai nga ai. Atik anang htawt hkrum ai hte maren tinang a dum nta hte yi sun hkauna ni hpe kabai kau da nna ya yang kan bau bungli kata ding hku kata grai yak ai ni rai nga ai lam chye lu ai.
Rim hkrum ai ni a dum n ta masha ni hte hku nna Myen Asuya Jinghpaw Mungdaw Up Hkang Du hpang de 4 November 2011 hta n dai rim hkrum ai marai 11 hpe dat ya na matu mastsan dum laika tang hpyi shawn lai wa sai raitim ya ten du hkra seng ai ni kaw nna bai htang shana wa ai lam n nga ai lam Kachin Review kawn hkap la lu ai n dau laika hte maren chye lu ai.
Bai nna Jinghpaw Wunpawng Bawngring Mahkri Shawn Hpung kaw na lit nga ai Ah Nan hku nna tsun wa ai hta “ Myen asuya kawn gaw marai langai mi hpe 150,000 Kyat the sa shaw la na lam dum n ta masha ni hpe tsun shana wa ai, raitim lu lu lu sha na pyi yak nga ai kaw gara kaw na ding re gum hpraw lu na, dai majaw dum n ta masha ni gara hku n chye di grai myit ru nga ma ai” Ya yang n dai marai 11 hpe gaw Myitkyina No(1) masat balik dap kaw rim da ai lam mung chye lu ai.
Lai wa sai 30 September 2011 Myen gumsam magam Slg. Thein Sein hku nna Mali Hka madim ( Myitsone Dam) galaw ai lam hpe shi a up hkang num daw ten hta jahkring da na nga n dau ai sai. Dai hpang kade n na yang Myitkyin Up Hkang lit hkam wa kawn Mining Ministry No. 2 hte Kha Ka Bo Mining Company hta lai nna kadai mung Tang Hpre( Myitsone ) ginra hta ja n mai htu sha na lam n dau lai wa sai rai nga ai.
“Myen mung asuya gaw mali hka hpe makawp maga ra ai nga n na jau man buga masha ni hpe gaw jahtu sha ai sha ai lam pat hkum nna maga mi de gaw shanhte nan laja lana htu sha nga ai hte mali hka hpe jahten nga ma ai” Ah Nan, Jinghpaw Wunpawng Bawngring Mahkri Shawn Hpung
