18 December 2011
Ka Ai; Kachin Review
Laiwa sai shata November hpang jahtum bat kaw nna Miwa mung hte jarit mare rai nga ai Lungga Zup mare de du nga sai hpyen yan masha 3,000 ram gaw ya ten du hkra garum ning tum lam hpe atsawm rai n lu la ai majaw grai yak hkak nga ai lam ni nawn ai shaga lawk kaw chyelu ai. Ya aten hta lamu marang grai kashung ai ram tim nga gin sum hpe pyi n lu galaw rawng hte machyi makaw ni mung grau grau law wa nga ai lam dai sadu gawan Sama Ginwang na sara langai Kachin Review de tsun shana wa ai.
N dai tsin yam ni hpe Shanglawt Asuya kawn n gu hte buhpun palawng ni loi li garum ya nga ai hte miwa mung kaw shanu nga ai jinghpaw myu sha ni hku nna mung dang lu ai made garum jaw ai hta lai nna gara kaw nag arum ningtum lam mung n du shi ai majaw grai yak hkrak nga ai lam mung chye lu ai.
Dai Sara hku nna matu tsun wa ai gaw “ myu mare hte Laiza makau hkan nga tsin yam dabang hkan UNICEF hte WFP ni kawn garum ning tum ni du hpang nga sai raitim dai shara( Lungga Zup) dabang de gaw ya du hkra kara hpung ni mung n du shi ai, ya aten gaw grai kashung ai rai nna ma ni mung grai jahkru ai hte kan mase ana byin ai lam ni mung grai law wa nga ai, tsi mawan ni mung hpa nan n nga ai”
N dai Lungga Zup tsinyam dabang hta du nga ai mare masha ni gaw Sama Ginwang na mare ni rai nga ai Gara Yang, Dabak, Katsu, Sampai, Ja Pu, Malang Yang, Sam Pai hte Dingga mayan hkan na ni rai nga ma ai.
Myen gumsam magam Thein Sien gaw laiwa sai December 10 hta Shawnglawt hpyen hpung hpe htim gasat ai lam jahkring na matu matsun sai nga raitim shawnglawt ginra ni de ya ten du hkra myen hpyen n gun jat ding yang rai nga ai majaw gasat gala ai lam ni gaw ding yang naw byin nga ai hte hpyen yan masha ni mung lani hte lani grau grau jat ding yang rai nga ai.
