Kachinreview

27 November 2011
Ka Ai; Kachin Review

Ya ten hta Jinghpaw mungdaw Sina Ginwang, Mu Gawng mare kaba makau mayang hkan na mare kahtawng ni hkan yi sun hkau na galaw sha nga ai mare masha ni hpe Myen Asuya kawn jahkrit shama shagyip shagyeng sha ai lam ni byin nga ai lam ni nawn ai shiga lawk kawn chyelu ai.

Buga masha ni yi sun hkau na sa ai lam ni hta ding bai ding na jaw jep shatsang rai nna buga masha n kau mi gaw seng ai ai myen up hkang rung hkan na madi shadaw lek mat ni la nna yi sa yi wa galaw nga ai hte tinang ai hkai n mai ni hpe mung n dai shata n htum shi yang lawan shu la ra na lam matsun da ai lam mung chye lu ai. Yi sa yi wa mung shana de hkying manga kaw nna a hkang n jaw sai hte dai ten hta hkawm ai ni hpe gaw gap sat na hkaw ahkang hpe mung jaw da ai lam mung chye lu ai.

“December shata kaw na gaw shanhte Myen ni majan kaba bai hpang na re, dai majaw December shata n du shi yang hkai n mai ni hpe lawan shu shakre la ra na, dai hpang gaw kadai mung mare shinggan n mai pru sana” nga nna dai ginra n dai bat lapran sa du lai wa sai Myitkyina, Kyunpinta na Hpawmi langai Kachin Review de tsun wa ai.

“ Ya ten hta mare masha ni gaw mare shinggan de pru na pyi n gwi wa sai hte Myen Hpyen ni mung Jinghpaw ni gaw yawng Shanglawt sha re dai majaw mare hkan mu ai jinghpaw sha rai yang gaw gap sat na a hkang jaw da ai majaw ya yang mare masha ni grai hkrit nga hte n dai gaw lu myu ye majan she rai wa sai nga nna tsun nga ma ai” nga nna dai hpawmi hku nna matut tsun wa ai.

Myen Hpyen ni gaw tinang Shawnglawt hpyen hpung hte gasat hkat nna shanhte si hkrum ai law wa yang hpa n seng ai mara kata Mung shawa ni hpe sat nat roi rip zingri ai lam ni hpe lang hte lang tawt lai nga ai rai nga ai.

27 November 2011
Ka Ai; Kachin Review

Laiwa sai bat lahkawng ram hta Myen hpyen ni n gun kaba hte grai htu wa ai majaw Sam Pai maga na tsin yam masha 3,000 ram hpe Miwa mung jarit mare rai nga ai Lungga Zup mare de htawt sit da sai rai nga ai. N dai tsin yan ni gaw ya ten du hkra raitim Shanglawt Asuya kawn n gu hte bu hpun palawng loi li garum jaw ai hta lai nna gara wuhpung kaw na mung garum ningtum n lu la ai majaw grai jam jau nga ma ai lam dai ginra de sadu gawan garum jaw nga ai KBC kaw na shara langai Kachin Review de tsun wa ai.

“ Ya ten du hkra gara wuhpung ni mung n sa du garum shi ai, Lai Za hte Mai Ja Yang maga hkan garum nga ai Wungpawng Ninghtoi hte Hpyen Yan Lakawn Lanawn Hpung ( RANIR) kaw na ni mung rai n du shi ai hku re, nga na dum n ta ni hpe gap la na arung a rai n nga ai majaw nam sumwum hkan mai byin ai hku ginsup kasha ni gap la nna sha nga nga ra ai” nga nna mung  tsun wa ai.

Ya ten hta lamu marang mung grai kashung ai rai nna machyi makaw mung grai byin wa nga ai hte a sak sum ai lam ni mung nga nga sai lam chye lu ai. “ Machyi makaw ngu na hta jahkru ai, kan mase hte hka li a na ni grai byin wa nga ai re” nga nna mung matut tsun wa ai.

N dai tsin yam dabang de du nga ai ni gaw ma kaji hte nu num ni, asak kaba sai ding gai ding la ni law nga ai la mung chye lu ai. N dai tsin yam dabang hta du nga ai masha ni gaw Gara Yang, Dabak, Katsu, Sampai, Ja Pu, Malang Yang hte Sam Pai mayan hkan nan i rai nga ma ai.

Ya ten hta Myen hpyen ni gaw Jinghpaw mung daw shara shagu hpyen n gun jat ding yang rai nga nna Shanglawt hpyen hpung ni hte shani shagu laja lana gasat hkat nga ai majaw hpyen hprawng hprawng mung shawa tsinyam ni mung lani hte lani grau grau law jat wa nga ai rai nga ai.

27 November 2011
Ka Ai; Kachin Review

Laiwa sai bat Masum ya 23 November 2011 shani Dabak Mare na Hpung Up Sara Rev: Dau Ze hpe Dabak Mare Hpungkyi Jawng kawng kaw jung nga ai Hka La Ya (58) kaw na Myen hpyen la  lahkawng shani kaang  ram e shi a n ta kaw sa rim mat wa nna 25 November 2011 shani bai dat dat ai lam ni nawn ai shiga lawk kawn chye lu ai.

Hpung Up wa hpe Dabak Hpungkyi jawng kawng e lana mi rim gyit zingri, shang lawt a masha re nga nna chye mayu ai lam ni hpe jahkrit shagyeng  san ai shaloi Hpung Up wa gaw shi shang  lawt ni hpa n seng ai shi a Lwi Dwi si sun wa yu ai sha re lam tsun yang shani tup lwi dwi sun hkan e gyit dun hkawm ma ai lam shi hte hkrum jahta yu ai ni kawn Kachin Review de shana wa ai.

Shi hpe Laiza lung wa lam maga de na mare ni rai nga ai Ja Pu, Malang Yang hkan du hkra shanhte Myen hpyen hpung hkawm ai shara shagu gyit dun hkawm wa sai lam mung chye lu ai. Masum ya na hpang 25 November 2011 shani hta gaw Katsu Mare maga hkran de woi wa ai. Katsu Hka Lup Hpung naw ku jawng ya du ai shaloi shi hpe woi hkawm ai myen hpyen la ni hku nna Nawku jawng mahkau e jahkring da ai mawdaw seng ke ni hpe madun let “ dai hpa baw re chye ai I”, “Hpungup wa hku nna mawdaw sengke ni re ngu bai htai yang”, e dai madaw seng ke la ni yawng hpe anhte ni gap sat kau sai nang hpe mung anhte gap sat mayu yang mai ai” ngu jahkrit shama ai lam mung chye lu ai.

Dai hpang kade nna yang Laiza lam maga na yu wa ai gala la lahkawng yu wa ai shaloi dai la ni hpe Myen hpen la ni hkap jahkring let n dai dingla hpe Myitkyina du hkra naw woi mat wa mu ngu bang dat ai hte Hpung Up wa gaw ya yang Myitkyina, Kyunpinta  n ta kaw e bai du nna hkring sa la nga ai lam na chye lu ai.

Lai wa sai bat ni hkan e seng ang ai Jingmung daw myen maga na mung up salang ni hku nna Wai Maw tsinyam dabang hkan sa du gawan ai shaloi ya yang nanhte a buga hkan majan n nga sai wa mayu ai ni mai wa sai nga nna sa tsun lai wa sai lam mung chye lu ai. Dai majaw ya yang Dabak mare hkan na buga masha n kau mi gaw seng ang ai tsinyam dabang lit hkam ni hkan na madi shadaw laika pa ni la hpang nna wa nga shajang nga ma ai lam mung chye lu ai.

Hpung up Rev: Dau Ze mung ya aten gaw chyeju dum poi galaw ai aten ladaw ni rai nga ai hte maren yi yang hkan nga nga ai hpung masha ni hte shi a sun dum nta ni hpe wa gawan na ngu nna Waimaw tsinyam dabang committee kaw na tsin yam madi shadaw laika pa ni la hpai nna wa ai raitim rim hkrum wa sai rai nga ai.

Art Field-3rd Art Exhibition
Ka ai: A Guy (Immanuel)

Shingni hte Htung Hking Ningli Dakkasu (Yangon) jawng yu ai manang ni hkrum zup let, ‘fellowship’ kanawn mazum ai lamang hku nna galaw ai ‘Art Field’ 3rd Art Exhibition hpe ‘Lokanat Gallery’ (Pansodan lam, Kyauktada Tsp, Yangon) e, November 14 ya shani kaw nna 19 ya shani du hkra, jahpawt 9:00 am kawn 5:00 pm laman madun nga ai. Ndai ‘Art Field’ shingni madun lamang hta Myen mung kata e nga ai amyu baw sang law law kaw nna; Myen, Rahkaing hte Kayin shingni sara ni lapran, Jinghpaw Wunpawng amyu sha langai hku nna ‘Lazum Brang Li’ mung shang lawm nga ai hpe mu lu ai.

Ndai shingni madun ai lam hte seng nna, Brang Li tsun dan ai lam gaw, “Art Field ngu ai ga baw hte madun ai group show hta, nye a hkrangpan shingni sumla (2) hpe yak hkak ai lapran kaw nna shakut madun tawn ai. Art hte seng nna Shingni Dakkasu jawng ngut ai manang ni hkrum zup nna jawm galaw ai lam rai nga ai. Ndai lang hte rai yang (3) lang rai sai.” Ndai Art Field show hta madun tawn ai ‘Brang Li’ a shingni (art) sumla ni hpe ‘Question?’ ngu nna shamying tawn nga ai.

Title: Question 1

‘Question-1’ ngu mying jaw da ai Shi a sumla hta, baw n kap ai Masha langai gaw lusha n lawm ai shat ban hte shat lakung lang tawn ai sumla hte seng nna, hpa lachyum hpe tsun mayu ai rai ta? ngu san yu yang, “Dai ni, masha ni hpe yu yang baw n kap ai zawn mu ai. Mung masha ni gaw ‘pressure’ grai law ai hte shani shagu tawt lai ra nga ai majaw, baw n kap mat ai zawn rai mat ai. Mu mada lu ai masha shagu gaw, mani sumsai rai nga tim mung asak n rawng nga ai. Dai majaw baw n kap (baw mat mat) mat ai zawn hkam sha ai,” nga nna shi a shingni hkrang shala ai lam ntsa mahtai jaw tsun wa ai.

Title: Question 2

Masha langai baw n kap ai sha, shi-laika hti nga ai ‘Question-2’ ngu ai sumla hte seng nna mung, “Myen shiga ni hta shanhte a lam chyu tsun shalawm nga ai. Dai sumla kaw, shiga hti nga ai masha baw n kap mat ai. Dai hpe mung masha ni yawng gaw chye nga ai. Shiga gaw nhtang hku ka da ai hpe, baw n kap ai masha gaw hti nga ai, shi hta baw n kap  rai tim mung, myit masin salum hte hti nga ai rai nga ai,” ngu nna sanglang dan ai.

Brang Li a myit kraw salum kaw nna pru wa ai sumla ni gaw, dai ni na aten hta Jinghpaw mungdaw kata hpyen-yen tsin yam hkrum nga ai lam hte mung seng ang nga ai lam chye lu ai. “Lu sha n lawm ai shat ban hpe lang tawn ai sumla gaw, hpyen-yen tsin yam hkrum nga ai ni ntsa hkam sha nna ka tawn ai sumla rai nga ai. Masha baw n kap ai hte shiga hti nga ai sumla mung, dai hte maren rai nga ai. Dai ni aten hta, shanhte galaw nna masha ni hpe mara shangun nga ai lam hpe shiga hta mu lu nga ai lam yawng gaw, n htang hku byin nga ai hpe lachyum shapraw mayu ai lam rai ng ai,” nga nna shi a sumla ntsa hkam sha ai lam tsun nga ai. Hpyen-yen ni hpe karum shingtau na matu yaw shada let ‘Wunpawng shingni myit rum hpung’ kaw nna woi-awn galaw ai, YJH (Yangon) gat dut poi hta shi a shingni sumla 3 hte shanglawm sai. Dai sumla kaw nna dut la lu ai gumhpraw sen 3 daram hpe mung, hpyen-yen ni matu garum sai lam chye lu ai.

Brang Li gaw Yangon hta galaw ai Art group show ni hta (14) lang shang lawm madun lai wa sai rai nna, shi a ‘First Solo Exhibition’ hpe mung lai wa sai 2011, September 20 - 25 ya laman, ‘Pan-so-dan-Art Gallery’ madu rai nga ai, U Aung Soe Min madi shadaw ya ai hte galaw byin sai lam chye lu ai. Shi a Solo show hta madun lai mat sai sumla ni gaw; lai wa sai 2008 ning kaw nna ka tawn ai shi a shingni sumla ni hpe madun ai lam rai nga ai.

Lai wa sai September hta galaw ai shi a ‘First Solo Exhibition’ hte seng nna tsun ai hta, “Ngai Solo show galaw amyu ai gaw grai na sai. Raitim, Ja gumhpraw a majaw n lu galaw byin ai, aten ladaw ni hpe shalai kau ra mat ai. Nye a Solo show hta ‘masha hte mung masa’ lachyum hpe madung tawn hkam sha nna hkrang shala tawn ai sumla ni hkrai rai nga ai. Mung masa hte masha a nga pra lam hpe madung tawn hkam sha nna ka tawn ai re.” Shi a ‘First Solo Exhibition’ hta sumla ni yawng 24 madun lai wa sai.

Shi a‘First Solo Exhibition’ hte seng nna, sa yu n-gun jaw ai shawa masha ni a ningmu hta, Myen mung shingni Pinra ntsa ‘contemporary art’ hpe ka taw ai Jinghpaw Wunpawng sha langai rai nga ai. Shi a sumla ni gaw, dai ni na Myen mung shingni madang hta hkap la lu na matu naw yak nga ai, ngu nna mu ya nga ma ai.
Brang Li gaw 2004 hta Yangon Shingni Dakkasu kaw nna (B.A-Painting) hte jawng ngut nna, Yangon shingni shingwang hta Jinghpaw wunpawng sha langai hku nna, shanglawm shamu shamawt ai gaw 7 ning rai wa nga sai. Jawng ngut ai hte, ja gumhpraw yak hkak ai majaw sumla shingni ni hpe hkrang shala madun na atsam n nga ai majaw, shingni myit lawm ai manang ni shada karum hkat ai hte 2007 ning kaw nna sumla ni hpe ka hpang wa sai.

15 November 2011
Ka Ai; Kachin Review

Laiwa sai shata 27-28 October 2011 shani hta Mali Hka masing a majaw htawt sit mare n nan rai nga ai Aungmyinta Sanpya mare na Slg. Lahpai Tu, Slg. Lamung Aung, Slg. La Nu, Shd. Tu Lum, Slg. Uga La Hkun, Slg. Nbaban Gam Seng, Slg. Uga An Tu, Slg. Zau Seng,Slg. Lamai Aung hte lawuga na myen la lahkawng gaw Mali Hka madim kaba masing ginra e jahtu sha nga yang seng ang Myen asuya ni kawn rim mat wa ai lam Jinghpaw Wunpawng Bawng Ring Mahkri Shawng Hpung a n dau laika hte maren chye lu ai.

14 November 2011
Ka Ai; Kachin Review

Lai wa sai  bat Kruya 12 November 2011 ya shani Gara Yang Mare hte Sam Pai mare lapran e nga ai Miwa Lau Ban Num Ah Lee Chye a company rubber sun makau Myen Hpyen dap dung masum Hka La Ya (260) Hka La Ya (390), Hka La Ya (389) hte Shanglawt Asuya hpyen hpung Dung (3) hte laja lana gap hkat lai wa sai. Dai majan hta gaw Myen Hpyen la 20 Jan hkrat sum nna Shawnglawt maga na gaw hkrat sum hkala ai lam n nga ai lam Shawnglawt up hkang du langai tsun shana wa ai.

Myen hpyen dap n gun 200 ram gaw Sam Pai maga de ding yang naw htu nga ai majaw dai hpawt maga Sam Pai mare n du shi yang na Hkauna pa kaw  e Myen hpyen lu sha wa htaw sa ai hpung hpe Shanglawt hpyen hpung kawn hkap gap ai majaw myen hpyen dap ni dai shara kaw na bai htingnut mat ai lam ni nawn ai shiga lawk kawn chye lu ai. Dai hpawt gap gasat  ai hta Shanglawt de na gaw hkala n ba n nga ai hte myen de na gaw kade hkrat ai lam n chye lu shi ai.

Ya yang Myen ni nau htu wa ai majaw shim lam hpe tsang nna Shanglawt Asuya kawn Sam Pai mare hta nga ai mung shawa 3000 jan hpe miwa ga jarit mare langai rai nga ai Lung Ga Zup de htawt sit da nna Shanglawt Asuya kawn marai langai n gu lani mi n gu pawng lahkawng hte kaga buhpun palawng ni hpe garan ya ai lam mung chye lu ai.

Tsin yam ni law wa ai hte maren lusha, buhpun palawng hte nga shara ni grai ra gatawn nga ai lam nga ai raitim ya ten du hkra gaw gara wuhpung kaw na mung atsawm sha garum madi shadaw la ai lam n lu shi ai lam mung chye lu ai. Mi wa Asuya kawn mung miwa ga hta tara shang machyu na ahkang n jaw shi ai hta n  ga miwa de na shalai ai tsi mawan, lusha hte hpun nba ni hpe wang lu wang lang n shalai lu ai the kalang lang pat hkum ai lam ni byin nga ai lam seng ang Shanglawt up hkang du langai Kachin Review hpe tsun shana wa ai.

Myen Asuya hte Shawnglawt Asuya simsa lam run nna June 9 kaw na laja lana bai gap hkat wa wai gaw shani shanang ngu na majan byin nga ai rai nga ai.

13 November 2011
Ka Ai; Kachin Review

Ya ten hta Gara Yang, Dabak, Katsu hte Aung Ja mare gin ra ni hkan myen hpyen hpung ni wuhpung kaba hte htu nga ai majaw Shanglawt hpyen hpung ni hkap gasat shingdang ai lam ni gaw shani shana rai nga ai. Dai ginra ni de htu nga ai Myen hpen  dap dung (7) dang rai nna n gun yawng kying grup yin re lam ni nawn ai shiga lawk kawn chye lu ai.

Ya a ten Myen hpyen ni gaw Sam Pai mare kaba makau hkan du lung wa ai majaw Shanglawt hpyen hpung ni hku nna laja lana hkap kasat ning hkap nga ai lam na lu ai. Sam Pan mare hta nga ai hpye tsin yam ni hte buga masha ni gaw shim lam n nga wa sai majaw ya yang miwa ga jarit de hprawng yan nga ma ai lam chyelu ai. Ya ten hta Miwa ga jarit mare langai rai nga ai Lungga Zup mare de hprawng yan du nga ai mare masha ni gaw 3000 jan mat sai lam mung ni nawn ai shiga lawk kawn chyelu ai.

Myen Hpyen ni gaw n dai ginra na mare ni rai nga ai Gara Yang, Dabak, Katsu hte Aung Ja hkan na dum n ta ni hpe adup hpaw nna la kam ai arung arai ni hpe shaw la, mare hkan na U wa yam nga ni hpe kam ai hku gap sha rai nga ai hte gap sha n dang na ngam nga ai dum su woi loi ni hpe ni nawn ai Hka La Ya (321) Shwe Nyawng Pyin hpyen dap de gawt mat wa ai nga nna buga na salang langai Kachin Review de tsun shana wa ai.

Briza mare masha ni atik anang shangun hkrum

Bai nna miga mi de Myen hpyen ni gaw Shanglawt hpen hpung ni yan kau da ai shara ni hkan hpyen dap nnan ni hpe dap jung shajat nga ai hte ni nawn ai mare masha ni hpe atik anang bungli galaw shangun sha ai nga ai lam lam mung chye lu ai.

Laiwa sai bat lapran hta myen hpyen ni grai htu wa nna Shanglawt hpyen hpung ni gan yan da ai shara Lungzep Kawng mayan hta ya yang myeng hpen dap nna bai jung hkyen nga ai lam chye lu ai. Dai makau na Myen hpen dap Dap dung rai nga ai Shwe Nyawng Pyin, Hka La Ya (321) gaw de a makau na Briza mare na masha ni hpe bai jat hkyen nga ai hpyen dap matu shani shagu bungli atik anang shangun sha nga ai lam ni nawn ai shiga lawk kawn chye lu ai.

13 November 2011
Ka Ai; Kachin Review

Myitkyina hte Laiza lam ntsa na Dabak Mare kaw shanu nga ai Salang Hpauyam Gam hte manang Maran Naw gaw lai wa sai bat lahkawng ya 1 November 2011 ya jahpawt nam rawng rawng nga ai kaw nna mare de pru wa yang mare de htu lung wa ai Myen hpen hpung Hka La Ya (318) hte hkrum katut rim woi mat wa ai kaw nna 9 ya na ai hpang 10 November 2011 ya jahpawt e bai lawt wa ai.

Shanhte yan hpe rim woi mat wat ai Hka La Ya (318)gaw Aung Ja Yang mare de htu lung wa ai hpyen hpung rai nna Aung Ja Yang mare du yang dai kaw gan dap jung nga ai Hka La Ya (321) Hpyen hpung de bai galai up dat ya hkrum nna shanhte a daju Shwe Nyawng Pyin ( Wai Maw) de bai du ai shaloi shi hpe bai dat dat ai hte lawt wa ai Salang Hpauyam Gam, asak 50 Jan gaw ya yang Myitkyina mung shawa tsi rung kaw tsi tsi hkam la nga ai. Shi hte rau rim hkrum ai manang langai mi gaw shan yan hpe rim mat wa ai lam lapran kaw nna ya du hkra gara de woi mat wa hpe n chye ai nga ai.

Shan yan lahkawng hpe Shang Lawt Asuya mung shawa hpyen la re nga nna woi mat wa ai re lam, kaja nga yang gaw shan lahkawng gaw hpa magam gun mung n rai mung shawa san san re lam chye lu ai.  Shi hpe rim mat wa ai shaloi sum ri hte gyit nna hpyen hpung hkawm ai shara shagu de gyit dun hkawm ai hte a dup gayet zing ri ai lam ni hpe shani shana katut sha ai lam mung chye lu ai. Shi hku nna Kachin Review hpe tsun wa ai hta “ shanhte nau gayat ai majaw ngai gaw n dum n dam rai hpa re pyi n chye , ngai na hkum hkrang lagaw lata ni yawng kya ma ai, ya ngai na garep lahkawng mung daw mat nna baw mung ga mat ai” nga ai. Matut nna tsun wa ai hta “ sha na rai yang wa gyit ai zawn gyit majaw nna hpun kaw noi kau kau rai ma ai”

Myen Asuya hte Shang Lawt Asuya simsa lam run nna June 9 ya kaw nna shani shana gap hkat wa ai gaw ya ten hta majan grau grau kaba wa nna Myen Hypen ni gaw shanhte hpyen hpung sa wa ai lam hkan na mare masha ni hpe mara kata sat nat, roi rip, zingri ai lam ni hpe galaw nga ai rai nga ai.