Ka Ai: Hkun Sam hte Naw La
13 January 2011
Southeast Asia hta kaba dik hte asak kaba dik htum rai nga ai, Jinghpaw Mungdaw hta nga ai dusat hkum Sali wunli hpring ai ginra rai nga ai Indaw Nawng gaw hten za magang nga sai lam, mungkan makau grupyin hpaji chye ninghkring ni kawn, sadi jaw nga ma ai.
Jinghpaw Wunpawng mung dan hta e bawng ring masing lam ni a majaw makau grupyin hte za ai lam ni gaw ding yang matut manoi rai nga ai. Ja htu sha ai lam, lung seng htu sha ai lam, hpun kran dut sha ai lam,hkai n mai myu hpan mi hpe sha aming ama hkai ai lam( mono plantation ) hte madim kaba ni hpe shachyaw ai lam ni a majaw makau grup yin grau grau hten jat wa ai hpe mu lu nga ai. N dai lam ni a majaw matut manoi byin wa ai mang hkang lam ni gaw buga masha ni a lamu ga ni hpe atik anang zing la ai lam, galaw lu galaw sha grau grau yak wa ai lam hte shim lam kata myu sha ni grau grau du hka hkrum wa nga ai.
Ka Ai: Naw La
2007 ning May shata hta manang langai mi hte nmyit mada ai sha mungkan hta mying gum hkawng ai manu dan lung seng pru ai shara Uru Seng Maw gin ra de du hkawm lai wa sai. Nye a prat hta Jinghpaw mung dan kata hta du mayu dik ai shara langai mi mung rai nga ai. Ya du hkra myen mung kata kaga mai gan amyu ni hku nna Kachin nga yang lung seng lu su ai amyu ni nga nna grai yu kaba ba ma ai. Kaja nan sha mung lung seng a majaw marai law law wa lu su nga mai wa yu saga ai.
Daini na ten hta Myen Asuya (State Peace and Development Council) gaw Wunpawng buga ginra aq Mali N’mai Zup, Mali Hka hte N’Mai hka nu ni hta madim kaba masing law law hpe jahkrat let gawgap taw nga sai re. Yaw shada lam gaw, ndai hka madim ni kawn, myihprap wan shapraw na, hte shapraw la lu ai myihprap wan ni hpe Miwa Mungdan de dut sha na, masing rai nga ai.
