Ka Ai: Hkalen Uma

Moi tsaban 20 ning hkan e gaw, matsan ai Mungdan hkan na Hpaji chye ai, kung zet ai Ramma ni kaga galu kaba nga sai Mungdan ni de sa mat wa yang Bawnu Yawng Mat Ai Lam (Brain Drain) re nga nna tsun chye ma ai. Dai hku nan sharin achyin nna kaba wa ai anhte Hpu shawng hpu ba ni mung kaga mungdan de pru hkawm mat wa na hpe n ra sharawng nga ma ai. Pru mat sai hte sum mat sai hku masat kau chye nga ai. Kaja nan mung dai ten gaw dai hku byin taw ai ten rai nga ai.

Ginsup shingjawng poi ni hta nambat masum lu ai ni hpe Magri dazik, nambat lahkawng lu ai ni hpe Gumhpraw dazik, nambat langai lu ai ni hpe Ja dazik shagrau chye ma ai.  Dai kumhpa ni hta kaga compensation prize ngu ai myit shapyaw kumhpa, zwe su ngu ai hpang jahtum pandung shang ai kumhpa,  hte lagaw din (soccer) ginsup poi ni hta san seng dik kumhhpa ngu nna kumhpa amyu myu naw shagrau ma ai.

Manang langai mi tsun yu ai: "Inglik laika hti gaw chye hti ai law, n chye na ai sha ra ai," da.  Mungkan ntsa e hpaji amyu myu hpe English laika hku ka da ai majaw English laika hpe chye hti yang manu dan ai sutgan amyu myu bang da ai sadek zaw amyu myu hpe mai hpaw ai zaw lagut lu da ai hte bung nga ai. Dai hta n-ga English laika amyu mi hpe atsawm sha chye yang kaga ga amyu 10 chye ai hta grau akyu rawng nga ai.  Mungkan Wunpawng hpung a Amu Madu kaba (UN General Secretary) tai lai mat wa yu sai Myen mung na U Thant gaw Myen ga hte English ga amyu lahkawng sha chye ai wa rai nga ai.